中環出更：盧偉國遊日不忘焚化爐
聖誕節同新年假期係傳統旅遊旺季之一，立法會工程界議員、前工務小組主席盧偉國（WK）最近去咗日本北陸旅行，不忘財務委員會仍未通過石鼓洲焚化爐計劃，特別去咗一趟大阪取經，參觀由大阪市環境局斥資興建、有「舞洲工場」之稱嘅垃圾焚化設施。
參觀「舞洲工場」學嘢
WK今次遊日浸溫泉之餘仲食咗當造嘅越前蟹，亦有參觀「舞洲工場」，據介紹，該座國際知名嘅垃圾焚化爐喺○一年建成，係奧地利國寶級藝術家Hundertwasser嘅作品之一。WK話，工場內有一座外形好似一個大蘑蘑、高一百二十米嘅焚化爐，每日可以焚燒九百噸家居垃圾之餘，仲可以同處理一百七十噸大型垃圾，既睇得又有實際用途。
WK同時發現，該處嘅廢氣排放標準比日本政府法定標準更為嚴格，加上焚化爐喺燃燒垃圾過程中產生大量電力，夠用之餘仲可以賣畀關西其他電力公司，大嘆時下唔少現代化城市都有轉廢為能嘅垃圾焚化設施，但香港就仍然要靠堆填區處理垃圾，佢再三希望，財委會可以盡快通過興建石鼓洲焚化爐撥款申請喎。
卓妮