中環出更：仁濟倒數派對 珠光寶氣
仁濟醫院歷屆總理聯誼會早前喺四季酒店舉行除夕倒數慈善餐舞會，作為該會重新啟動嘅頭炮，唔少歷屆仁濟總理回巢與數百賓客同樂，一邊倒數一邊欣賞維港煙花。搞手仁濟總理陳李詠詩及羅穎怡（Wendy）一早到場迎賓，Wendy仲喺現場義賣英國仿真鑽石飾品，以開心價為仁濟籌款。唔少人當場買嚟戴上，襯托當晚Bling Bling華麗閃耀主題。
本身係律師嘅Wendy係羅氏針織後人，返家族公司幫手經已三年幾，對零售、酒店及商場管理上晒手，近年仲幫手買地起樓。Wendy話，佢曾經自創一個鞋履品牌，後來被上市公司收購，最近就代理呢個英國珠寶品牌，目的係令城中姐妹可以用相宜價錢扮靚，唔使下下大出血買真鑽石喎！
翡翠鑽石耳環搶眼
講到扮靚，又點少得一向打扮貴氣嘅仁濟前主席董吳玲玲，當晚佢戴住一對由精緻翡翠及閃鑽鑲嵌嘅吊墜耳環，十分搶眼。董太話，呢個設計係佢嘅新嘗試，事關依家大件靚翡翠既貴又難求，所以佢將細粒翡翠重新包裝設計，既掃走單件翡翠嘅沉悶，價錢又冇咁貴，佢都覺得好滿意咁。
仁濟前主席嚴玉麟（Stanley）及太太嚴徐玉珊亦拍拖到場，好多人上前恭喜佢哋，原來嚴家大仔嚴子杰啱啱生咗名BB女，難怪佢首次抱孫嘅Stanley及嚴太成晚笑不攏嘴喇！
卓妮