政情：張曉卿獻詞淪獻媚
自詡「公信第一」但報道卻頻頻出錯嘅《明報》，繼因公信力排名下跌而被迫自拆招牌後，《明報》社長張曉卿昨日一如既往發表元旦獻詞，話就話「回顧過去、展望未來」，但內文就離題萬丈、獨沽一味力數佔領行動為禍，同份報紙大撐佔中嘅報道大相逕庭，呢份報紙精神分裂o架！仲有，佢篇文有一半喺度大讚北京如何大力肅貪同依法施政，但佢份報紙之前咁反斗，佢依家點擦鞋都無用啦。
同《明報》取態大唱反調
《明報》過去不但出錯當食生菜，頻頻刊登更正啟事之餘，專欄作家亦擅長開天窗，去年更同《蘋果日報》孖住上力撐佔領行動。唔知張曉卿係咪自知無能力管理員工，每年一度感興大發撰寫千字文，積極向北京耍冧，過氣批評佔中，佢話：「部分法律界人士為了政治需要，一度鼓動佔領者毋須理會禁制令，使法庭權威面對挑戰」，又指香港「離開有法律效力的憲制架構，民主進程就無從談起」。佢嘅講法同報紙新聞嘅取態大唱反調，令人幾乎聯想唔到佢至係老闆！
張曉卿在文末更開門見山指，雖然佔領行動「使法治在香港萌發崩壞苗頭」，但法庭最近處理案件嘅方式彰顯法庭公正不阿及司法獨立，盼望「有朝一日，法治中國與法治香港相互輝映，是許多華裔子孫的冀盼和夢想」，相信有同感嘅人一定感動到眼濕濕。文章對象似乎係北京喎。
工會話鍾天祥「令人不安」
張曉卿呢頭發表元旦獻「媚」，明報職工協會即日就以「鍾天祥坐正令人不安」為題向張曉卿呢個心腹下戰書，不滿昨日正式坐正《明報》總編輯嘅鍾天祥，喺出任代總編輯期間拒絕簽署新聞約章或與員工對話，亦未有為員工遮風擋雨力保《明報》「傳統」，要求佢以真實行動支持新聞自由喎。不過，《明報》內部管理立立亂，張曉卿無力管治更要親自撰文為佔領行動補鑊，最坐立不安嘅應該係佢囉。