中環出更：校友登報幫譚志源「開年」
政制及內地事務局局長譚志源（Raymond）曾經自嘲係元朗鄉下仔，估唔到佢母校新界鄉議局元朗區中學（元朗鄉中）二百多名校友對佢念念不忘，昨日更聯署登報為佢「開年」，不但以黑底白字譴責Raymond近日片面詮釋《中英聯合聲明》嘅內容係顛倒是非、為政不公，仲對Raymond言論「深惡痛絕、引以為恥」添！唔講清楚仲以為佢犯下咩彌天大罪。
發叔稱聯署「不代表我」
Raymond去年聖誕前出席立法會會議公開表明，《聲明》嘅歷史任務已經完成，對港人生活方式五十年不變嘅條文亦只係中方聲明，可能因為咁辣部分校友，督促佢勿忘校訓「務本力學」，唔好只係為人大「背書」。但身兼元朗鄉中校董會主席嘅鄉議局主席劉皇發（發叔）就話，呢份聯署「不代表我」喎。
元朗鄉中係鄉議局當年有份科水籌建，發叔話事前唔知情，但亦唔介意，笑言自己嗰套係舊思維，會尊重學生。
不過，發叔亦都話政改好難「一朝成井」，唔係掘一掘就可掘到個井出來，仲話都係嗰句，循序漸進，按部就班喇。Raymond依家放緊假，相信佢都冇眼睇喇。
卓妮