人有三衰六旺，香港時運低，衰運接踵而來。呢，佔領鬧劇啱啱暫告一段落，禽流感又殺到埋身，搞到除夕都要「大開殺戒」，簡直大吉利是。
話說內地供港活雞樣本再次驗出帶有禽流感病毒，當局如臨大敵，派員到長沙灣臨時家禽批發市場撲殺一萬九千隻活家禽，而且封場二十一日，停止內地活雞供港。話時話，禽流感由年頭爆到年尾，令人不勝其煩，而更大鑊嘅係，香港及深圳近日都有人類感染個案，連港大專家都話病毒南移，好可能已入侵農場，預料禽流感陸續有來，總之就係手尾長喇。
講真，冇雞食事小，爆發疫症事大。面對禽流感來勢洶洶，港府除咗一味殺雞，斬腳趾避沙蟲，仲有乜對策呢？食衞局局長高永文係咁講嘅，打鼓嶺活雞檢查站即將投入運作，但要先等漁護署完成巡查及檢測二十九個本地註冊家禽養殖場內嘅家禽，確認無問題先可以將活雞送去打鼓嶺，再分流至零售點應市喎。
其實，禽流感之所以長期困擾本港，導致頻頻殺雞，主因就係當局冇做好兩地家禽分流，每次內地雞出事都要本地雞陪葬，搞到雞農雞毛鴨血，市民亦要承受病毒威脅嘅風險，所以咯喎，當局亡羊補牢都無可厚非嘅。不過咁，高永文一早打定底，聲稱打鼓嶺活雞檢查站啟用初期難免出現甩漏，仲話只要本港一日維持活雞供應，就無可能做到禽流感零風險喎。
咁擺明係卸責啫，業界十年前已要求當局設立兩個家禽批發市場，將中港家禽分家，但前食衞局廢官周一嶽當作耳邊風，一於少理，搞到禽流感爆完一鑊又一鑊，仲一度想學人搞中央屠宰，結果一事無成。嗱，前車可鑑，高永文一定要做得好好睇睇，千祈唔好步周一鑊後塵呀。
講開又講，家陣又點止禽流感肆虐咁簡單吖，流感、登革熱、腸病毒正值高峰期，加上伊波拉同新沙士仍然喺世界各地橫行，陰霾揮之不去，萬一數疫齊齊拍門，後果不堪設想。唔係杞人憂天，港產官僚出名渾渾噩噩，所謂嘅防疫措施同唱空城計冇乜分別，唔止各口岸防疫把關兒戲，公立醫院嘅衞生情況一樣令人慘不忍睹，再咁落去，隨時爆大鑊嘅咋。
冇計喇，香港時運低，年頭黑到年尾，簡直雞犬不寧。今日係元旦，新嘅一年開始嘞，唔該港產官僚醒醒定定，做好防疫工作，唔好再甩甩漏漏吖，須知佔領鬧劇已經搞到香港元氣大傷，如果加埋疫魔臨門，香港想唔玩完都幾難。