政情：楊哲安一家滑雪撇B女
教育局前政治助理楊哲安（Jeremy）太太張新悅早前再為楊家添千金，但Jeremy並冇冷落太太，日前撇低連護照都未申請嘅B女，同大女、二女遠赴瑞士、法國滑雪慶祝聖誕。不過，Jeremy笑言，原本打算去歐洲休息吓，點知佢同老婆太鍾意滑雪，由朝滑到晚仲攰過返工喎，唔知假期仍要返工嘅打工仔聽到有乜感受呢？
選戰排頭位開心
Jeremy一家四口上周遠赴瑞士薩斯費（Saas-Fee）同法國Châtel兩大滑雪勝地過足滑雪癮，每朝工作就係送兩女去當地滑雪學校練習滑雪，然後兩口子就瘋狂滑雪到天黑先收工，認真識歎。
滑雪過後，區議會及立法會選戰今年起連續兩年舉行，Jeremy所屬自由黨嘅黨魁方剛，早前漏口風話有意將佢擺喺參選名單頭位，身兼該黨港島南支部主席嘅Jeremy稱心理上已經準備好，亦好開心個黨有部署，但對未來選戰就封口唔提，只係話時間唔多，一定要由榮譽主席劉健儀領軍咁話。