政情：八網難逃：白鴿橫額錯字連篇

繼早前有兩名民建聯北區區議員嘅聖誕宣傳橫額被發現串錯字後，近日民主黨北區區議員羅世恩喺區內嘅橫額及單張同樣有錯字，包括將工展會寫做「公展會」、勘察寫做「堪察」。我哋曾經致電羅世恩議員辦事處查詢，雖然其助理直認係自己心急寫錯，但就質疑人哋因為幾個錯別字唱衰佢哋喎。之後我哋聯絡到羅世恩，佢就急急補鑊，話得知橫額寫錯字，已經即時更正。羅又話，有時工作繁忙難免有漏網之魚，為咗減低橫額出現錯字同語法問題，今後會提醒同事校對清楚先好將橫額擺出街。