政情：經民聯標誌 黨員唔肯掛
踏入二○一五年，今年政界重頭戲除咗政改，年尾嘅區議會選舉都好有睇頭。經民聯呢兩年一直出動銀彈「收購」多名區議員，雖用錢買到人，但買唔到個心，最近更被踢爆唔少區議員喺區議會網頁上，根本無申報係該黨成員。事後該黨高層下令，要班區議員一個月內印番經民聯標誌，點知有區議員獅子開大口反索價每月一萬元做「宣傳費」，聽聞呢個要求激到班經民聯高層紮紮跳，聲言一定唔會科水咁話。
驚無得做直選「樁腳」
每逢區選臨近，區議員嘅價值就會以幾何級數上升，有區議員「待價而沽」，今年亦唔例外，聽聞被經民聯收購嘅區議員，分成兩類人士，一類認為經民聯每月津貼得幾千元，所以對外只係報稱係獨立人士，如果經民聯硬係要佢哋喺地區工作同區議會網頁顯示經民聯個名同標誌，唔係唔得嘅，但就要增加津貼囉。有少數人仲獅子開大口，叫價每月多一萬元的資助。
至於另一批區議員就睇得遠啲，因為區議員最大價值係擔任立法會選舉「樁腳」，如果經民聯無得玩直選，咁區議員掛住該黨牌頭，就無得做其他政黨樁腳，即係得物無所用，所以呢類區議員一直持觀望態度，唔肯瞓身押注落經民聯身上，亦係佢哋唔肯申報該黨身份嘅原因。
前車可鑑 高層拒科水
被區議員咁屈法，經民聯高層條氣梗唔順啦，佢哋願意加碼泵水，但每月加多一萬元資助就無可能。因為磅完水都唔代表有回報，呢啲情況當年屢次發生喺自由黨身上，相信經民聯高層見過鬼怕黑，唔敢再做人肉提款機。
至於民主黨（白鴿黨）同公民黨（公文袋），亦積極備戰區選。首先白鴿黨每月向每名社區主任派發二千五百元津貼，再視乎佢哋嘅表現同投入程度派發特別津貼，加加埋埋分分鐘有成七、八千元。至於公文袋，今年轉行「精兵制」，改派表現突出嘅後生仔出選，社區主任津貼亦由每月二千元加至五千元，又裁走一批表現參差嘅社區主任，總之要確保出選者有一定勝算。