中環出更：鄭錦鐘監警冇有怕
自從佔領行動發生之後，獨立監察警方處理投訴委員會（監警會）嘅工作多咗市民留意及關注，前排政府公布新一屆監警會委員名單，就旋即引起討論。日前我哋見到新委員之一嘅保良局前主席鄭錦鐘（Eric），當然要問吓佢點解會接咗呢個燙手山芋啦。
唔抗拒入赤柱「探仁」
Eric解釋，其實過往做過唔少公職都同處理投訴有關，好似交通投訴組，甚至太平紳士嘅工作，負責到監獄或精神病院聆聽及處理相關投訴，所以當政府邀請佢做監警會委員時，佢衡量過能力應付到就決定嘗試。對於部分監警會新成員被指有政治背景，佢就話知道呢個崗位有爭議性，但毋須太過政治化，佢會堅持以不偏不倚嘅態度，加上以往處理投訴嘅經驗去判斷事件對錯。
講起近期前政務司司長許仕仁等人因為貪賄被判入赤柱監獄，成為城中熱話，身為太平紳士嘅Eric就話，同案中四人唔熟，但通常太平紳士一年會有兩次「巡倉」機會，至於巡視邊個監獄或病院則由政府隨機委派，如果有機會，佢都唔會拒絕入赤柱監獄了解吓喎。
卓妮