中環出更：踢「盲波」考起丁志威
港隊盲人足球隊，今年將衝出香港遠赴首爾參加世界賽。身兼黃大仙區議員嘅青年議會副主席丁志威（Roy）日前與香港盲人體育總會，舉行一連兩日友誼熱身賽，吸引亞洲多支勁旅過江挑戰，小型足球會會長霍啟山都冒寒去觀戰。不過，原來盲人足球唔易踢，而且難度相當高。
今次熱身賽吸引來自中國、泰國、印度及馬來西亞嘅盲人球隊參賽。Roy睇好中國隊，趁休息時間蒙住雙眼，落場與球員一決高下，誰知踢「盲波」難度相當高。Roy話雖然足球經特別設計，滾動時發出噹噹響聲，但球場上太多雜聲，要「聽」個波飛咗去邊，又要預測隊友走位，有如黑暗中玩捉迷藏，無從入手。
啟山讚港隊默契強
香港盲人體育總會副主席羅德榮都接受挑戰，誰知踢咗五分鐘就索晒氣話：「唔好講話踢，我連聽個波喺邊都未聽到。」
比賽當日，愛踢小型足球嘅啟山喺場邊睇得津津有味，表現興奮。佢話首次親身睇失明人士踢波，估唔到隊友間默契咁強，球感敏銳。雖然眼中無球，但心中有球，令人佩服。佢又讚港隊有潛質，希望為佢哋爭取更多可供練習嘅室外人造草地場，提升技巧。
盲人體育總會創會主席孫國華、主席周德煒都喺場邊做啦啦隊。賽事鬥得難分難解，最後由中國隊以二比一擊敗泰國隊奪冠，港隊就未能進身總決賽。但賽後Roy與青年議會會長馬鴻銘及主席陳婉珊，齊號召約五十名義工請班球員品嘗香江美食，又接送佢哋去機場，認真唔話得。
卓妮