正所謂，掃把唔到，灰塵唔會自動消失。前政務司司長許仕仁因為涉貪而鋃鐺入獄，前日仲正式移送赤柱監獄服刑添，不過咁，呢單世紀貪案完結，唔代表官場已經乾淨，其餘貪官依然逍遙法外，當局究竟仲要等到幾時至肯大掃除呢？
講緊咪就係前特首曾蔭權爵士同埋前廉政專員湯顯明呢對「絕代雙貪」囉，一個貪遍省港澳，一個茅台換政協，成為香港有史以來第一個被廉署調查嘅港府一號人物以及廉政一哥。但奇怪嘅係，廉署查嚟查去得個吉，尤其係貪曾案，調查接近三年仲未有下文，你話係咪匪夷所思吖。
同樣係貪官，有人受到法律制裁，有人繼續風流快活，擺明有蠱惑喇。聽吓市民點講吖，「東方報業民意調查」顯示，三成三受訪者批評當局調查太慢，有包庇之嫌；三成一要求盡快交代進展，不能不了了之；兩成二直斥敗壞廉政和法治。咁又係吖，廉政同法治係香港賴以成功嘅基石，亦係最寶貴嘅核心價值，當局拖拖拉拉，官官相護，即係自毀根基啫。
唔係危言聳聽o架，「透明國際」早前公布最新全球廉潔排名，香港比去年連跌兩級至十七位，成為八年來最低排名，分數亦創下回歸以來第二低。呢嗱，廉署今年首十一個月接獲嘅投訴個案比去年同期減少一成一，相反，市民唔願意舉報嘅比率就節節上升，咁表示乜嘢？三成三受訪者認為削弱廉署反貪能力；兩成七直指廉署令人失去信心，唔願舉報；兩成七人更擔心香港廉潔度大減添。
冇錯嘞，一方面整體投訴個案少咗，另一方面涉貪被控嘅政府人員就比舊年激增五成三，須轉介相關部門採取紀律調查嘅人員亦上升三成九，證明貪污問題惡化，廉政招牌搖搖欲墜。唔怪得三成二受訪者認為當局唔打大老虎，導致貪污風氣蔓延；近三成人直指上樑不正下樑歪。
講開又講，今日香港烏煙瘴氣，又點止官場腐敗咁簡單吖。反對派政客收受淫賤黎政治黑金，狼狽為奸，淨係一場佔領行動就搞到香港七國咁亂，元氣大傷，但廉署調查一樣冇晒聲氣，當局更加放生呢班牛鬼蛇神添，問你服未。
今時今日，反腐成為世界潮流，連內地都唔手軟，大老虎打完一隻又一隻，反而港府對呢班貪官特別仁慈，講都冇人信。無論點都好喇，拖得過初一，拖唔過十五，牛鬼蛇神始終要掃除，廉署愈快清理門戶，香港愈早得到解脫，新年就快到喇，依家唔郁手，仲要等到幾時吖！