政情：「小特首」發信 盼質詢吳得掂
教育局局長吳克儉（吳得掂）自一二年上任以來頻頻外訪，兩年半內外訪超過廿次，外訪開支更超過三百六十萬元。雖然吳得掂諸多解釋死撐有外訪需要，但一班「小特首」尋日公布嘅《小小施政報告2014》，內容全部針對教育政策，當中令佢哋最不滿嘅係融合政策及特殊教育。「小特首」仲向吳發公開信，希望約佢見面當面質詢，唔知外訪次數頻繁嘅吳抽唔抽到時間呢？
倡向台特殊教育借鏡
今年小小施政報告嘅主題係「我有我的起跑線」，主力探討教育範疇。其中一名「小特首」馬思澄話，發現唔少教師都要應付繁重嘅教學同行政工作，為佢哋帶嚟沉重壓力，希望教育局為有志從事特殊教育嘅老師提供多啲協助。佢哋四月時曾經探訪台灣嘅特殊教育學校，發現當地喺推行分流配對方面有良好效果，建議吳參考有關做法。
一班學生去次台灣已留意到當地值得學習嘅地方，相反吳外訪足迹遍全球，但仍未揣摩到適合香港嘅教育政策，其實係咪應該反省吓呢？政制及內地事務局副局長劉江華今年再次擔任主禮嘉賓，佢好謙虛話自己依家喺政府嘅情況就好似喺起跑線上。咁又係，點似得吳咁識「飛」吖！