佔領行動結束後難得有幾日聖誕節假期，立法會議員葉劉淑儀就同愛女飛去泰國曼谷過一個熱辣辣嘅聖誕。可能佢嫌未夠熱，專誠去當地一間好出名嘅烹飪學校學煮泰式料理，幾粒鐘內極速學識煮冬陰公、泰式炒河及咖喱雞三款泰菜，有得玩又有得食，一舉兩得。葉太自嘲係「無飯煮婦」，估唔到經過專人過招後就成功下廚，第日可以多啲同愛女喺屋企玩煮飯仔嘞。有網民就留言話，葉太着起圍裙個樣特別「慈母」，仲話唔少泰國總理競選前都鐘意去煮餸以示親民，難道今次葉太煮餸都有呢個意思？
（互聯網）
