政情：鬍鬚曾放水 唔認轉性

鬍鬚曾早前先幫政府緊縮開支，要求各政策局同政府部門，目標喺三年內一共節省開支兩個百分點。但大家點都估唔到，佢會喺預算案公布前夕大開水喉，突然成立房屋儲備金，令外界唔少人都質疑佢係咪「轉性」，一改以往保守作風。佢尋日喺網誌上解釋，確有提過未來三個財政年度可以維持「年年有餘」，仲話呢個預測唔係得個講字，係根據財政預算案嘅「中期預測」推算。

話財政盈餘唔代表會派錢

不過，佢話就算短期內政府財政充裕，唔等於以後年年都有盈餘，更加唔代表政府會派錢，強調自己從來無「轉性」，因為做咗財政司司長咁多年，眼見唔少外國政府因為債務問題而出現金融同管治危機，令佢更相信穩健財政唔止係一份亮麗帳目，仲可以影響深遠喎。

佢又話，作為財政司司長，如果明知將來環境有可能逆轉，仍然無及早作出準備，防患於未然，係極不負責任嘅做法，所以今次突然設置二百幾億房屋儲備金，就係藉現時財政充裕而做足準備。既然佢識得咁諗，終於識使錢以防不時之需，咪即係轉性囉，點解又要否認呢？

一個涉及二百幾億元嘅政策，鬍鬚曾都係網上公布就算，所以大家都以為佢會一直閉關至寫完預算案為止。點知佢尋日突然出席四年一度嘅「沙田節」棒球活動，仲化身成「棒球小子」，先做投球手，然後再拎住支棒球棍做擊球手，而且一擊即中，唔通佢暗示畀大家聽，政府係時候重錘出擊，一改以往孤寒作風？