中環出更：「兒」時苦讀 外賣仔變律政官
法律改革委員會前秘書長黃繼兒（Stephen）尋日接受電台訪問，大談童年往事同昔日工作點滴。Stephen憶述自細喺大埔偏僻嘅鐵皮屋長大，由於家庭經濟條件較差，令佢深信讀書先至可以脫貧，於是勤力苦讀，終於考入港大法律系。讀大學期間，Stephen都有去山寨廠「啤」鎖匙扣，又做外賣仔等兼職幫補家計。
山寨廠「啤」匙扣賺零用
Stephen透露，當年去山寨廠「啤」鎖匙扣賺零用錢，要由朝早八點做到夜晚六點，但每日嘅人工都係得一元。不過，由於山寨廠唔係時時都有工開，佢就會踩單車做外賣仔送雲吞麵，一手控制單車，另一手拎住十碗麵亦揮灑自如。放暑假時，佢就會去遠啲幫人清潔地板同打蠟賺錢。
Stephen大學畢業後隨即加入政府做「皇家大狀」，服務政府足足三十四年先至退休。被問到當年點解要加入政府，佢話由於當年政府聘請律師嘅起薪點較一般律師行高，加上佢自問讀書時全靠考到政府獎學金先至可以夠錢畀學費，令佢對政府有情意結，覺得要「報恩」喎。
卓妮