中環出更：抽中沖繩機票 楊華勇囉囉攣
近期唔少人都鍾意趁日圓匯率低去日本玩，但有部分人就仍然因為怕受輻射影響而卻步。卓妮尋日喺沙田馬場見到菁英會榮譽主席楊華勇（Johnny），記得佢曾經講過話短期內唔會去日本，但早前佢喺聖誕派對抽獎偏偏抽中去日本沖繩嘅免費機票，搞到同太太依家心郁郁。
話說已有兩個小朋友嘅Johnny生育計劃並未完成，本來講過唔排除會同太太繼續追多個，為免日本地震後嘅輻射影響佢哋嘅造人大計，梗係盡量唔去啦，即使幾鍾意都只係靠食日本菜頂住癮先。
怕輻射影響造人未必去
不過，即使依家抽中機票，佢同老婆都「囉囉攣」唔知去唔去好，而兩張機票嘅使用限期係一年之內，除非急急十月懷胎追多個嘅啫。
相反馬會大董陳南祿（Philip）就唔使考慮咁多喇，事關佢個女已經亭亭玉立，仲準備好今日陪佢同太太一齊飛去日本過除夕及元旦假期。雖然佢哋都去過日本好多次，但佢個女就話未試過喺日本倒數，想感受吓當地人着晒和服齊齊去祠廟嗰種節日氣氛。對於咁有特色嘅假期，以往有寫開旅遊書嘅Philip就話唔會再寫喇，因為要專心做好目前嘅工作喎。
講起今年除夕銅鑼灣無倒數，想去嘅市民就要改去尖沙咀，馬會大董梁高美懿就話唔會去湊熱鬧，但佢唔係怕鳩嗚團，只係約咗班朋友慶祝啫。保良局前主席鄭錦鐘就會同太太到澳洲及新西蘭過二人世界，浪漫倒數兼浸溫泉。
卓妮