「又到聖誕，又到聖誕！」歌仔都有得唱，聖誕節係普天同慶嘅大日子，梗係要開開心心啦。不過咁，有人歡喜有人愁，前政務司司長許仕仁鋃鐺入獄，未來幾個聖誕節都要喺冷冰冰嘅鐵窗下度過，想唔愁都幾難。
點都好喇，許仕仁貪腐案總算告一段落，受到應有嘅懲罰，之但係許仕仁前上司、前特首曾蔭權爵士嗰筆又點計呢？嗱，尋日有多名市民不約而同致電烽煙節目，質疑點解貪曾至今仲未落鑊，反映市民對貪官深惡痛絕，對當局選擇性反貪非常不滿。咁又係呀，一樣係貪官，有人受到法律制裁，有人逍遙法外，點講都唔通喇。
睇吓佢哋嘅罪狀，其實大同小異嘅咋。許仕仁同富豪為伍，貪曾一樣同富豪勾搭；許仕仁變相免租入住豪宅，貪曾就賤租深圳禮賓府；許仕仁收受富豪金錢利益，貪曾就接受富豪遊艇及私人飛機款待。如果話有分別，就係貪曾食相特別難睇，連一隻雞、一棵菜心都唔放過，貪腐程度比許仕仁有過之而無不及。你話喇，前特區二號人物得到咁嘅下場，前特區一號人物有乜理由例外？
最好笑嘅係，貪曾其身不正，個名臭晒喇，仲好意思為許仕仁撰寫求情信，讚到對方天上有地下無，好似許仕仁係官員典範，而唔係罪犯。明眼人一睇就知，貪曾咁落力求情，其實係為自己開脫咋，許仕仁係貪曾一手提拔，家陣淪為大貪官，唔通貪曾冇責任咩？兔死狐悲，你估貪曾唔驚有一日輪到自己咩？
冇計喇，上樑不正下樑歪，貪曾亂港七年，成個政府烏煙瘴氣，仲創下多個不光彩嘅「第一」添。呢嗱，貪曾自己係第一個被廉署調查嘅特首；前廉政專員湯顯明係第一個被自己手下調查嘅廉署一哥；許仕仁更加唔在講，成為第一個涉貪入獄嘅政務司司長。香港廉潔排名跌跌不休，廉署形象一落千丈，真係多得呢班貪官唔少。
話時話，廉署調查貪曾接近三年，查嚟查去都冇下文，簡直離譜。廉署審查貪污舉報諮詢委員會主席施祖祥話喎，貪曾案唔會「被消失」，但披露太多會影響調查公正性，廉署必須「密密實實」。講就好聽咯，一件黑白分明嘅案件都拖拖拉拉，如果話當中冇官官相護，三歲細路仔都唔信喇。
無論如何，反腐係世界潮流，點擋都擋唔住。家陣連內地反腐都唔手軟，大老虎打完一隻又一隻，相對而言，貪曾只不過係蒼蠅，廉署無理由唔敢打啫。講多無謂，行動最實際，唔該當局唔好淨係得把口，快啲將絕代雙貪落鑊喇。