政情：「後感冒時期」 星爺唔外遊
持續多時嘅佔領行動終於結束，唔少人話香港正處於「後佔領時期」，而金融界立法會議員吳亮星（星爺）就覺得依家唔止係「後佔領時期」，仲係「後感冒時期」添！事關佢喺佔領期間成日要開會，所以捱到病咗，不但患感冒，喉嚨仲損埋添！到依家佢把聲都仲係沙沙哋，睇嚟有排先至清得晒。
話說前兩日星爺喺立法會司法事務委員會會上發言，佢把聲既沙啞又低沉，仲好重鼻音，同平時真係好大分別，令人側目。星爺解畫話，佢已病咗一段時間，雖然依家感冒嘅主要症狀經已好番晒，亦都唔使再戴口罩，但喉嚨仍然未完全康復，所以仲要食藥，預計成個聖誕都會處於「後感冒時期」。所以決定聖誕節唔外遊，專心留港養病，以免感冒翻發咁話。