政情：頭箍小姐大讚三女上司

包括戴婉瑩 葉劉 俞宗怡

講緊邊三位呢？就係前申訴專員戴婉瑩、行政會議成員葉劉淑儀及公務員事務局前局長俞宗怡喇！「頭箍小姐」形容戴婉瑩做嘢好硬淨，尤其係處理知識產權方面嘅工作時處理得好好。至於葉劉就好夠膽提出新穎嘅諗法，當年提出測試玩具安全嘅新做法時，仲反問大家點解唔得，非常有膽識，呢種作風同相對保守嘅公務員好唔同。

至於俞宗怡，「頭箍小姐」話，記得有次交一份預備咗幾個星期嘅報告畀俞宗怡，點知佢只係用咗唔夠三十分鐘就搵到十幾個錯處，仲將文件彈番轉頭，所以話俞宗怡係一個行事謹慎但好有效率嘅人，令佢非常欣賞。

三入財經科 懷念長走廊

「頭箍小姐」臨退休前咁樣稱讚人哋，其實佢曾經喺多個政策局及部門服務，仲三次進出財經科，經歷咗唔少風雨。例如有份參與引入內地國有企業到香港上市集資，佢笑稱如果當年少啲改革勇氣都做唔成。到咗九七年就經歷咗一場金融風暴，有份「日以繼夜、夜以繼日」開會商討修改《證券及期貨條例》工作。直至○九年出任財庫局常秘，佢又參與開辦人民幣喺香港嘅發展及資產管理工作。難怪佢笑言，三十二年內冇一日唔係忙住咁過。

尋日最後一日返工嘅佢，辦公室物品已經執拾得七七八八，佢話最懷念嘅可能係每朝開會前必經嘅一條走廊，有成一百米咁長，沿途嘅牆上貼有同事及活動嘅相，今後就只能留喺記憶中回味喇！