政情：中環出更：偉銓做監警 「搶閘」報喜惹誤會
港府尋日公布獨立監察警方處理投訴委員會（監警會）嘅新名單，立法會建築、測量及都市規劃界謝偉銓（Tony）同金融服務界張華峰雙雙獲委任為副主席，接替即將卸任嘅工業界林大輝同石禮謙。不過早喺政府新聞處出稿前四個鐘，Tony已經發稿公布，惹來佢「搶閘」公布呢個好消息嘅猜測。但原來只係一場誤會。
早過新聞處公布
Tony話，尋日朝早出版嘅憲報已經刊登咗有關消息，於是就出稿公告天下，佢唔知新聞處要等到下晝先至公布，話自己絕無「搶閘」之意。至於監警會其他成員亦有變動，港大法律學者張達明同方敏生卸任，換上陳章明、鄭錦鐘、何錦榮、許宗盛、關治平同任景信六人，令該會成員由廿四人增加至廿八人。
另外，政府亦公布一連串委員會成員名單，張建良接替石丹理出任禁毒常務委員會主席，水務署前署長馬利德出任環境諮詢委員會成員，立法會前勞工界議員葉偉明則接替潘佩璆出任人力發展委員會成員一職。
卓妮