政情：中環出更：雙梁賀佳節 賢妻顯心思
聖誕節又到，唔少名人出埠旅遊或探親，不過尋日名人聚腳地嘅香港會就好熱鬧。卓妮見到港大校務委員會主席梁智鴻（金刀梁）同佢細佬醫院管理局主席梁智仁兩家人一齊食晏。金刀梁太太馮令儀好有心思，買咗兩部有WiFi功能嘅相機畀一對仔女，等佢哋喺外國忙於工作時，亦可第一時間將生活點滴傳返嚟，唔使佢哋兩老心掛掛喎！
金刀梁出名係工作狂，平安夜一樣無休，踩行油睇症。不過一對仔女難得回港，於是抽空約埋親戚食晏團聚吓。梁太話，囝囝捷榮喺中東工作，負責酒店建築項目，平日想見佢一面都難；至於喺美國從事網絡保安工作嘅女兒捷華就更忙，每年只可返嚟幾日。
潮送仔女智能相機
既然一對仔女咁忙碌，梁太揀聖誕禮物時就落足心思，緊貼潮流買咗兩部有WiFi功能嘅相機，兩個仔女一人一部，方便佢哋即影即傳相咁話。
至於廚藝一流嘅梁智仁太太梁許安璞，平安夜梗要大顯身手。梁許安璞話，夜晚會為家人炮製一味火腿薯仔配牛柳，至於應節嘅大火雞就留待聖誕夜先食，梁智仁真係有口福喇。但真係有口福嘅又點止梁智仁，梁太話，佢屋企養咗一隻狗，所以佢特登買咗一批靚狗糧，等愛犬喺聖誕節亦可擦餐勁。
除咗梁氏兄弟之外，卓妮轉頭又見到香港國際仲裁中心主席王桂壎，佢一支公喺香港會食晏。講起平安夜點過，王桂壎話，夜晚同家人食完豐富晚餐後，會去教堂望彌撒，過一個寧靜嘅平安夜。
卓妮