香港電影業近年停滯不前，好多人歸咎題材老舊又或者網上下載猖獗。計功夫茶話齋，港產片嘅真正「死因」主要係人才問題。鬼咩，演技最精湛嗰啲影帝統統去晒政界搵食，仲邊有人扲荷包入戲院睇戲吖。
嗱，佔領鬧劇終於收皮，港府再冇藉口唔專注民生議題，於是咪喺房屋問題大做文章囉。繼推出長遠房屋策略後，港府再宣布泵水二百七十億元設立房屋儲備金，成效就未見嘞，大家淨係見到一眾高官即刻化身吟誦「安得廣廈千萬間，大庇天下寒士俱歡顏」嘅杜甫。發展局局長陳茂波尋日話喎，依家仲有時間加緊努力完成十年建屋目標，希望公眾支持東北發展區等計劃；運輸及房屋局局長張炳良亦嚟個深情告白，話對於有市民因為冇選擇而住劏房，覺得係社會嘅悲哀喎。
爭啲漏咗財政司司長曾俊華添，佢尋日雖然冇粉墨登場，但網誌同樣咁憂港憂民。佢話包括房屋和土地供應等重要議題，唔應該成為政改爭議嘅犧牲品。你話嘞，班高官一個比一個好戲，荷里活巨星都唔夠佢哋撈啦。
唉，其實房屋問題愈演愈烈，劏房遍地開花，港府咪就係罪魁禍首囉。呢班高官住洋樓養番狗，生活安樂無憂，特別係鬍鬚曾，日日飲咖啡睇法國電影鬼咁自在，想佢哋了解基層蝸居之苦，盞嘥氣啦。仲有吖，波波局長之前「經營劏房千萬間」，由佢出聲為劏房戶謀福利，你話幾咁諷刺吖。
話時話，港產官僚居然仲好意思講劏房問題，面皮成尺厚，又真係唔到你唔服。前朝貪曾政府翹埋雙手坐視房屋問題惡化嗰筆唔講，今屆政府口口聲聲「寸土必爭」、「見縫插針」，其實咪又係姿勢大過實際。睇吓早排有外國電視台採訪深水埗天台屋，搞到香港貽笑國際；再睇吓家陣連北區嘅上水都有劏房，仲係一劏十，呎租媲美豪宅嗰隻，就知基層住屋問題不但冇改善，反而不斷惡化啦。
不過咁，高官固然好戲，政客都唔弱o架。係人都知，香港唔係冇地，之所以成日要問「地從何來」，之所以有咁多窮人捱生捱死仲要住喺危機四伏嘅豆腐膶單位，除咗政府無能，仲因為政棍阻頭阻勢。最難頂嘅係，呢班政棍呢頭話為基層弱勢發聲，嗰頭又搞破壞，好似新界東北發展計劃咁吖，明明可以提供大量住宅單位，一樣畀佢哋拖垮。神又係佢，鬼又係佢，真係演技渣啲都唔掂。
始終都係嗰句，政府無能、政客無恥，特別係一眾垃圾高官，人工高過奧巴馬，能力弱過小學雞，呢個先係社會嘅最大悲哀呀！