被謔稱「吳得掂」兼外訪多過返工嘅教育局局長吳克儉，近日頻頻「『遊埠』也中槍」。
立法會議員田北辰（田二少）尋日接受電台訪問時，提及學生參與佔領行動，以違法及影響他人利益嘅手法，爭取憲法上冇可能達到嘅訴求，反映香港教育制度失敗，更予人感覺佔領學生有姿勢、冇實際、自私兼意氣用事添，句句都衝住吳得掂而來，擺明指桑罵槐。
自佔領行動爆發以來，吳得掂幾乎全程潛水，未有就學生擔當運動主導發聲，除咗個人能力問題外，經常離港「考察」相信係原因之一。
田二少昨主動向吳得掂開火，指對佔領學生嘅爭取手法好失望，反映政府回歸後對於「一國兩制」嘅教育工作徹底失敗，建議政府要讓學生趁中學時期多了解《基本法》，唔應該因為擔心被指「洗腦」而實施「鴕鳥政策」。
田二少更擔心長此下去，有強烈反法治、反政府意識嘅新政治勢力形成，將違法行為「正義化」，相反理性討論就被邊緣化。唔知吳得掂聽到意見後，會否考慮少啲考察，多啲留港做實事呢？