政情：工記絕技小花挑基
區議會選舉明年就舉行，各政黨政團磨拳擦掌備戰，其中民協立法會超級議員馮檢基身兼深水埗（麗閣）區議員，而工聯會（工記）社區幹事范國輝由○三年起三屆選舉挑戰阿基都屢戰屢敗，所以工記明年選舉決定換人，派出雙學士小花、又係運動健將嘅陳穎欣（Joephy）出戰。有政壇中人話，工記志在撼贏阿基，但最擔心阿基轉軚撐政改方案，到時工記就要焗住讓路作為阿基支持政改嘅交換條件。
一一年派劉桂容撼贏「人」
范國輝一直喺新家園協會工作，形象同年紀同阿基都差唔多，未知係咪咁，打極都打唔贏。工記試過一一年區議會派出小花劉桂容，成功喺天水圍擊敗立法會議員李卓人，自然食過翻尋味，明年選舉照辦煮碗，派出香港大學經濟金融學學士及英國倫敦大學法學學士Joephy落麗閣選區插旗挑「基」。
其實范國輝近兩屆同阿基嘅票數相差不足一百票，據聞佢都唔多想走，但最終無奈被勸退。皆因原來Joephy父親係海關人員總會主席、工記副理事長陳志光。Joephy有父蔭祝福，范國輝想唔讓路都唔得喇。唔知係咪因為咁，聽聞工記對阿基個區議會議席志在必得，但實情仍存在隱憂。
倘馮轉撐政改 或焗收韁
有政壇中人話，有機會轉軚支持政改方案嘅泛民主派議員當中，傳聞阿基係其中一人。如果阿基真係轉軚，或會同有關方面講數，要求建制派唔好派人挑戰佢個區議會議席，倘若有關方面首肯，Joephy就要焗住收韁返歸，白白浪費前期備戰工作，所以工記似乎最想阿基堅持立場，反對政改方案咁話。
不過，工記中人就另有想法，話政府要向泛民撬四、五票，唔止要阿基一票，所以撬票之說係風聲多過實際。該人又指阿基身為政壇老將，無理由驚個「細路女」，係都擔心區選會被激進泛民攻擊，萬一泛民之間互相廝殺，建制派就會漁人得利，到時阿基連立法會超級議席「入場券」都無埋，還原基本步選番九龍西。