中環出更：林煥光為慳袋 廚餘雪住先
綠色生活係時尚，妥善處理廚餘，都可以響應環保。世界綠色組織日前舉辦綠色辦公室獎勵計劃頒獎禮，行政會議召集人林煥光（WK）做得嘉賓，綠色心得都唔少。WK透露，佢同太太喺屋企撐完枱腳後，會將廚餘用膠袋包起再放入冰箱，儲足一個星期先棄置，每星期只用一個膠袋就搞掂，既慳袋又環保。
不過，將廚餘儲埋雪一星期，乾嘅廚餘好似生果皮都還可以，但濕嘅廚餘唔怕發臭咩？WK冇講呢個問題，只係話多得環境局局長黃錦星（KS）教路喎，如果KS都係咁做，應該冇問題嘅。WK話，本來想買部廚餘處理機，可惜喺屋企度完一輪位置後，都係唔夠位放部機，所以惟有用急凍廚餘法先。
洪為民自助餐唔換碟
國際青年商會香港總會會長關俊華就將綠色概念帶到公司，除栽種多盆有殺菌效能嘅植物外，又喺燈掣上貼上慳電字條，提醒同事離開公司前要關燈。
互聯網專業協會會長洪為民都諗出「慳碟」方法。佢話，每次去食自助餐都會「一碟用到尾」，減少換碟。至於世界綠色組織會長汪振富就呼籲大家將環保變成習慣，去到世界各地都要做「綠色地球人」。
中央政策組全職顧問高靜芝亦身體力行，拒絕收花支持環保。佢自爆拍拖時已叫男友咪送花，一來嘥錢，二來睇見鮮花凋謝，心情都跟住差，寧願收朱古力或番梘，實用好多喎。
卓妮