妖孽不除，永無寧日！佔領行動落幕，但唔代表亂象結束，百足之蟲，死而不僵，禍根唔除，政治鬧劇隨時重演o架。
佔領行動搞到烏煙瘴氣，令整個社會付出沉重代價。保安局局長黎棟國指，佔領期間政府財物被大肆破壞，鐵馬、水馬、垃圾箱、圍欄同路牌等被示威者挪用作路障，幾十輛警車被破壞，連超市、機場快綫手推車同建築地盤工具亦被盜用。仲有吖，有人偷去馬路兩邊渠蓋，甚至罔顧公眾安危，強行撬開佔領區部分燈柱同交通安全島指示燈，擅自取電。佢強調，如果有足夠證據證明佔中三子同「雙學」非法挪用政府財物，當局必定循民事途徑向有關人士索償咁話。
其實，盜用財物固然要追究，違法者固然要承擔責任，但相對於佔領行動搞到香港雞毛鴨血，法治蕩然無存，呢啲仲係小事。打蛇打七寸，擒賊先擒王，最重要係將幕後黑手繩之以法。
正所謂，冤有頭，債有主，好多衝鋒在前嘅示威人士只不過係小嘍囉，被人煽動蒙蔽，如果唔嚴懲煽風點火嘅幕後黑手，唔止無法重建法治精神，亦無法向受害嘅市民交代。
呢，佔領搞手中，有法律學者同來自法律界嘅議員，亦有以藍血貴族自居嘅大狀，呢班人知法犯法，係摧毀法治嘅罪魁禍首，而嗰個出錢出力赤膊上陣扮「指揮」嘅淫媒大亨黎智英，更係眾所周知嘅幕後大黑手。
淫賤黎除咗被踢爆透過黑金操縱反對派並資助佔中，由佔領行動醞釀、推動到啟動，壹淫媒一直妖言惑眾，煽風點火，佢甚至唆擺學生上京衝擊亞太峰會「博拉」，簡直喪心病狂。
令人難以理解嘅係，金鐘成功清場後，呢班牛鬼蛇神本來已一網成擒，當局唔止冇乘勝追擊，將佔領搞手同幕後黑手繩之以法，反而效婦人之仁，將佢哋統統無條件放生，問你服未。
當局放虎歸山，亂港勢力自然有恃無恐喇。呢，佔領搞手公然威脅，如果政改方案唔符合所謂國際標準，香港將會有「暴動」；淫賤黎亦肆無忌憚同「搞事四人幫」策劃新陰謀，亂港妖孽蠢蠢欲動，佔領鬧劇隨時死灰復燃。
對敵人仁慈就係對市民殘忍，放過牛鬼蛇神就係對香港犯罪。咪話功夫茶唔提醒，如果當局唔依法辦事，將幕後黑手繩之以法，妖風一吹，亂象重來，香港呢次未必可以「重光」o架喇。