廢官翻閹，事實證明只能變成一堆廢柴，不燒成灰燼，頂多也只能是小狗吃了牛屎——只看堆頭大！周一鑊，我忘不了你！法國啟蒙時期思想家孟德斯鳩講過，大自然本有明智嘅安排，每個人嘅愚言愚行都不會流傳久遠，之不過，後來書籍出現打亂了這一切，讓每個人嘅愚言愚行都可能與世長存，垂之千古。
嘩！呢段說話完全為廢官周一鑊度身訂造，佢做食衞局局長時，任內屢爆傳染疫症及醫療失誤，對雙非及醫護人手問題後知後覺，其劣迹斑斑，老朽在此販文認可區都唔知炳咗佢幾多鑊！如此廢官，好衰唔衰，政府又翻閹佢出任平機會主席，月薪高達近二十二萬元，仲喺去年四月一日「愚人節」上任，擺明玩殘港人！
如今事實證明，一件廢物加一件新嘅廢柴，係唔會令個社會有動力嘅！更唔會令環境變得清新，只會添煩添亂。周一鑊上任平機會主席短短一年，已出現近四百萬元虧損，唔好忘記，廢官未出任時，平機會原先有六十三萬元盈餘，家陣又使凸幾百萬又冇做過一件正經事，修訂現行四條反歧視條例，擬將「族內歧視」和「事實婚姻」納之保障範圍，其「忽然大愛」又「忽然正義」激起社會極大反彈！但見佢周不時出席同志平權活動，又擔任同志遊行彩虹大使，平機會嘅角色係推行法例，唔係叫你同啲同志歌星玩埋一齊唱出愛火花啊！既有「特定立場」，試問又怎會持平呢？
平機會過去屢被批評管理失當兼「大花筒」，審計署報告亦多次直指其行政混亂，資源管理「混帳」，咁嘅一個聲名狼藉、形象插水嘅機構，由前廢官翻閹嘅廢柴出任主席，大家想像可以變出彩虹咩？
再唔摺埋佢，等廢柴再廢噏兩年，唔止蝕只會流血更多！到時點止虧蝕四百萬咁濕碎啊！