外號「三點不露」嘅立法會金融界前代表李國寶霸住議席廿七年，出席率低又少提質詢，最終被有關方面下令「退休」，所以先由前選舉委員會界別嘅吳亮星（星爺）重出江湖。不過，星爺表現強差人意，尤其係幾個月前財委會審議新界東北發展前期撥款期間，被泛民主派圍插，連建制派都有怨言。近期金融界就傳出有人希望下屆易將，仲傳李國寶有意叫大仔李民橋接棒。
立法會眾多功能組別中，如果話要代表香港呢個國際金融中心，一定係金融界。不過，聽聞一眾金融界人士都對星爺評價一般，覺得佢作風舊派，完全無「賓架」外形，尤其係一眾外資銀行，更加不滿星爺只聽命於北京，完全無幫業界出頭。
有見及此，聽聞東亞銀行主席李國寶有意嚟一招「隔代傳位」，密謀叫阿仔李民橋接掌金融界議席，穩固李家江山。其實一二年李國寶退位時，已經傳出呢個消息，但當時金融界覺得李家把持議席太耐，希望有啲新作風，可惜現時星爺搞唔起，仲成為建制派負累，反而益咗李家密謀翻盤，相信事前無人估得到。不過，除咗李民橋外，唔知仲有冇其他選擇呢？