一間公營機構換主席短短一年，財政即刻轉盈為虧，入不敷支，你覺得以下邊個係禍因呢？選項一，機構管理混亂；選項二，主席無能腐化。其實，兩個答案都啱，平機會本來已經爛到入心，加上由「每周一鑊」嘅周一嶽揸弗，仲唔亂象叢生，醜聞不絕咩！
嗱，睇吓平機會盤混帳先啦。根據該會最新上載網站嘅年報，揭露周一嶽去年四月上任主席後，即令平機會「蝕大錢」。截至今年三月底，該會錄得九千七百多萬元收入，主要由政府補貼，雖然進帳與一二/一三年度相若，但支出急升至超過一億元，令一三/一四年度出現近四百萬元虧損。不得不提嘅係，平機會本來有六十三萬元盈餘，家陣唔止花盡積蓄，仲蝕凸幾百萬元添，使錢好似倒水咁倒，你話唔係大花筒都冇人信喇。
平機會點大花筒法呢？好簡單，睇吓支出結算表咪知囉。喺過去一個財政年度，平機會嘅職員薪酬開支高達逾五千七百萬元，增幅達一成六；未用年假嘅準備增長開支超過五十七萬元，飆升一點二五倍；法律費用支出約近一百三十萬元，激增近四成。年報亦揭發，職員外訪、會議及培訓開支暴增至超過六十六萬元，較對上一個年度急升逾兩成。大家話嘞，平機會洗腳唔抹腳，呢樣支出又激增，嗰樣使費又飆升，點會唔入不敷支吖？點會唔浪費公帑吖？最荒謬嘅係，平機會處理嘅新增投訴下跌一成四，即係工作量下降，行政開支反而激增，當中究竟有乜景轟，畫公仔唔使畫出腸喇。
功夫茶真係好想問吓周一嶽，閣下做食衞局局長時係咪嫌尸位素餐都唔夠喉，所以入主平機會後要揮金如土濫用公帑？你做官時係咪覺得「周一鑊」個花名仲未夠臭，所以家陣想多個新寶號叫「周一腐」？前特首曾蔭權爵士同前廉政專員湯顯明之所以有「絕代雙貪」稱號，就係因為假公濟私揮霍無度，平機會家陣開支急升，職員外訪等使費暴增，審計署同廉署不妨開「快勞」查一查，隨時捉到另一隻庫房大老鼠o架。
所以話，周一嶽真係廢官之最，打骰平機會短短一年幾之嘛，已經搞到平機會醜聞百出，醜上加醜。就算唔講內部管理混亂呢一筆，佢治下嘅平機會同樣鑊鑊新鮮鑊鑊甘，好似早前就性別、殘疾、家庭崗位同種族歧視條例檢討進行公眾諮詢咁吖，無事生非，添煩添亂，結果引發滿城風雨，全城鬧爆，簡直就係死性不改。
不如咁講啦，留平機會喺度搞風搞雨，本身就係最浪費公帑，港府索性撥亂反正，將呢個唯恐天下不亂嘅大花筒機構摺埋，將廢官一嶽掃地出門喇。香港亂局未定，人心躁動，若然港府能夠一次過為市民除去兩大害，話唔定民怨都少啲o架，咁做比乜鬼「再啟蒙」仲實際喇，係咪！