佔領行動甫落幕，「搞事四人幫」成員之一、「民主阿婆」前政務司司長陳方安生再次「攪局」，前日同傳媒茶敍時突然提到喺人大常委會現有嘅政改框架下，雖然唔可以爭取到最理想方案，仍認為當中仲有談判空間，隨即惹嚟人民力量陳偉業（大舊）強烈反彈，不點名強烈譴責民主阿婆毫無良心，且出賣群眾利益。
大舊尋日回應記者提問時，雖然全程無直接提到民主阿婆個名，但言談間多次以「she」嚟形容對方，意有所指連番暗批民主阿婆。
大舊首先批評，有自稱民主派嘅人士認為喺現有政改框架下仍然有商討空間，批評有關言論係出賣學生同佔領行動。
佢又話佔領人士連日堅持喺街頭留守，都係希望爭取真普選，但有人渾水摸魚自稱係民主派人士，其言論已經出賣咗自己，呼籲民主派同參與佔領行動人士，要認清楚自稱民主派嘅人，並覺得要對出賣群眾利益嘅人予以譴責。