政情：推銷侍產假 蕭副局免申報
港府建議立法規定男士可享有三日有薪侍產假，尋日草案正式到立法會「闖關」。勞工及福利局副局長蕭偉強（Stephen）首次以副局長身份去立法會，幫手推銷男士有三日法定侍產假，希望上任後首個草案可以「順產」。佢自言，唔使申報利益，因為細仔今年已經廿五歲，最希望快啲抱孫，留番畀細仔享用侍產假。
想有「祖父母侍產假」
Stephen其後自爆，太太曾經發夢見到自己懷有第三胎，夫婦二人都形容呢個為惡夢，笑言要做好家庭計劃。不過，當問及會否想有祖父母侍產假時，佢就笑笑口話「都好喎」。
講到同議員過去打交道嘅經驗，Stephen話之前加入問責團隊前做過康復專員，當時已同立會關心福利課題嘅議員聯繫交流，今次亦努力爭取勞工界支持。佢再三強調，拉票係團隊工作，即使男士三日侍產假順利通過，都係大家嘅功勞，唔敢功高蓋主咁話。