政情：議員嗌大交 撥款得個吉

斥袋巾傑濫權驕橫跋扈

話說上周四金鐘清場時十多名泛民議員喺金鐘佔領區「博拉」，包括袋巾傑在內嘅十三位身兼工務小組成員嘅泛民最終被捕，翌日先陸續離開警署，袋巾傑上周五凌晨經立法會秘書處諮詢議員意見後，決定取消當日朝早嘅會議。身為上年度工務小組主席嘅工程界議員盧偉國（WK）質疑，雖然當日有廿六位議員反對開會，但仍有十三位議員表示會出席，有足夠會議法定人數，加上即使正、副主席未能主持會議，委員都可互選人選主持會議，唔明袋巾傑點解唔跟議事程序做嘢。

樹根其後加入戰團，狠批袋巾傑濫用職權、「驕橫跋扈」，又揶揄泛民並非日日都公民抗命，只係清場時先至等上鏡「博拉」，認為明明當日被釋放後有足夠時間返立法會開會，都寧願返屋企瞓覺，根本就係為咗自己私利喎。

范國威諷「鍾」於講得啱

面對建制派炮聲隆隆，新民主同盟議員范國威反擊指，建制派係「乘人之危、雙重標準、老羞成怒」，又將矛頭對準樹根，諷刺對方過往同袋巾傑駁火時成日開口夾着脷，尋日終於正確咁講得出四字詞語咁話。另一泛民議員陳偉業亦寸爆樹根，形容對方係使用四字詞嘅「權威」，冇人勁得過佢。

話說回頭，其實「AV仁」民主黨何俊仁上次已就一項建議提出中止待續，原來尋日本應討論有關建議並進行表決，點知建制同泛民為咗一個已取消嘅會議互轟不是，前後拗咗個幾鐘，最後中止待續議案就喺AV仁不在場、泛民又唔齊人嘅情況下匆匆被否決，再次無一項撥款申請獲批就結束會議。