中環出更：獲封新「懶蟲」 高佬賢唔認
立法會議員天主教監察組每年都會對議員進行監察並發表報告，尋日佢哋就公布上個立法年度嘅議員表現，鄉議局主席劉皇發（發叔）同醫學界議員梁家騮（怪醫）照舊榜上有名被指係「懶蟲」，而新上榜嘅則有漁農界議員何俊賢（高佬賢），監察組於是對三人予以譴責。
睇番監察組數據，高佬賢被指冇提出動議、發言七次、質詢四次，高佬賢接受查詢時質疑調查偏頗，又話唔應該計較提出幾多質詢，應該睇對業界貢獻，佢下月就會提出動議討論農業發展，但都會接受社會批評。
監察組疑雙重標準
當問及泛民五名議員收取壹傳媒肥佬黎政治捐款，監察組就疑「少罵大幫忙」，佢哋認為公民黨黨魁梁家傑唔應該用個人戶口處理政治工作，有改善空間。
至於承認收錢嘅工黨李卓人（阿人）同社民連梁國雄輕率處理捐款，監察組形容「實屬不智」，其中阿人仲擺咗筆錢喺自己戶口九個月，因此要對兩人予以批評，不過監察組其後又話阿人因此被廉署調查係「匪夷所思」。監察組對「懶蟲」又記缺點且連聲譴責，對於泛民議員嘅批評疑似就住，話佢哋係以同一把尺去發炮，講都無人信啦！
卓妮