中環出更：名廚甄文達 巧遇甄沾記後人
今年工展會又係一眾廠商年尾發力追數嘅時候，唔少攤位都各出奇謀，務求趁聖誕及新年假期前後追番早排因佔領行動受影響嘅營業額。尋日卓妮就喺工展會會場內見到名廚甄文達，喺甄沾記攤位大展刀功。雖然甄文達及甄沾記第三代傳人甄賢賢都係姓甄，但原來二人並非親戚，本身亦互不相識，只因機緣巧合於美國三藩市相遇相識。
甄文達話，細個喺廣州嘅舊居附近有間甄沾記，經常聞到大陣椰子香，令佢留下深刻印象。不過九十年代末，甄沾記跟隨當時潮流北上設廠失敗，於○六年時更被迫停業數年。
早聞椰子香 三藩市做街坊
甄賢賢其後移居三藩市，巧合地甄文達亦喺當地，二人做咗街坊並成為朋友。尋日甄文達為咗到場幫甄賢賢打氣，專誠一早拍完節目由越南趕嚟香港，仲帶埋自家設計靚刀表演刀功，但完咗活動翌日佢又會即刻離開香港，認真唔話得。
講起好多人鍾意冬天食野味進補，甄文達自言甚少咁做，強調只要有均衡飲食嘅習慣，食咩都點到即止，就唔使刻意進補。佢仲話，現時好多動物嘅棲息地被人類入侵，環境受污染，有病毒入侵咗啲動物都未必知，所以食野味有一定風險。
卓妮其後巧遇廠商會常董戴澤良及「糧油大王」李廣林之子李豐年。原來李豐年亦同甄賢賢相識多年，仲曾於甄沾記停業時勸甄賢賢重出江湖重振家業，皆因佢哋嘅椰子糖係好多人嘅童年回憶。
卓妮