對好多香港人嚟講，單車只係一種消閒娛樂工具，不過今日功夫茶想提醒大家，萬一唔小心，單車隨時成為高危交通工具o架。點解？咪因為喺香港踩單車危機四伏囉，意外率愈嚟愈高不特止，仲分分鐘搞到車毀人亡，唔係講玩o架。
嗱，單車意外愈嚟愈多，愈嚟愈恐怖。警方數字顯示，去年接獲單車交通意外二千四百多宗，較○三年即十年前嘅一千四百多宗急升七成一，意外大多發生喺大埔及沙田區，仲多過電單車意外。淨係一○年至今咋，沙田威爾斯親王醫院就有十三宗死亡個案，踩單車變踏上黃泉路，究竟有幾危險，畫公仔唔使畫出腸喇。
點解當局要自爆單車意外飆升呢？原因好簡單，為咗補鑊囉。聖誕及新年長假期將至，唔少市民會選擇到戶外享受單車樂，所以當局呼籲大家注意安全，避免樂極生悲喎。而為咗提高市民嘅危機意識，官老爺不忘透露一個相當震撼嘅數據，假日嘅單車意外比平日高出三倍，單車發燒友最好加強安全措施，步步為營。
即係咁，孖轆騎士傷亡急升，既可以話係意外，亦可以話係意料之內。冇錯，單車意外成因好多，有啲唔係人力所能控制，不過單車徑設計失敗，暗藏死亡陷阱，呢樣係人都知，唯獨官老爺唔知，或者知都唔理，市民有乜可能唔中招吖。就講單車徑好似斷橛禾蟲咁吖，東一截，西一截，搞到市民被迫踩出馬路，與車爭路，險象環生，點會唔容易出事吖？意外點會唔飆升吖？正所謂，我不殺伯仁，伯仁因我而死。港府與其提醒市民小心踩單車，不如提醒自己用心做事，速速改善單車徑仲實際喇！
所以話，功夫茶有時真係懷疑港產官僚係涼血動物，如果唔係，點會見到市民前仆後繼浴血馬路都無動於衷。其實，單車徑網絡天殘地缺，問題存在咗N咁多年喇，當局一直話要改善，由貪曾上台講到貪曾落台，再講到依家後佔中時期，依然只聞樓梯響，不見路徑來，唔通真係要等市民忍無可忍佔領單車徑，官僚先至會火速補鑊？講開又講，當局年前咪煞有介事話打造超級單車徑，將新界東、西單車徑接龍嘅，十畫有一撇未吖？
事實再次證明，港產官僚胡混度日，懶得就懶，唔係路上零意外，而係路上多意外。各位孖轆騎士，馬路如虎口，安全第一命長久，今個假期玩還玩，記得注意安全吖，港府無心無肺，香港淪為危險城市，市民只能自求多福嘅咋。
至於港產官僚咯喎，既然你哋呼籲市民小心，功夫茶亦呼籲你哋小心，如果繼續渾渾噩噩，懶理市民死活，小心睇路吖！