政情：鄉局莫財 謀車場變地舖收租
耗資兩億元興建嘅沙田石門新界鄉議局大樓長期入不敷支，繼年前賣甩九龍塘舊址還債填氹後，大樓專用停車場去年更增設時租車位賺外快，但單靠出租場地又點夠鄉紳使費呢？鄉議局主席劉皇發（發叔）眼見帳簿滿江紅，尋日即時扑錘研究改建停車場部分車位做地舖出租，有望再「發」一筆填氹。
鄉議局尋日舉行例會，但壞消息接踵而來，先有鄉議局位於英國倫敦嘅海外顧問委員會（歐洲聯絡處）追收三百萬港元營運開支，鄉議局申請豁免過百萬元差餉失敗；加上大樓每月營運坐底虧蝕十萬八萬元。鄉議局莫講話自給自足，就連基本開支都足襟見肘，主持大局嘅發叔都咪話唔頭痕。
會議臨近尾聲，發叔主動建議將停車場出入口隔籬、面向馬路嘅車位「改裝」地舖出租，更即席成立小組研究可行性。不過，政府當年以一千元象徵式租金批出大樓現址，鄉議局想好似丁屋僭建咁改裝大樓，就要先向政府部門申請改變土地用途，否則發叔想收租撲水睇怕都唔易。