政情：立會「火警」議助逃生無門
尋日中午十二點半，立法會大樓餐廳「起火」，大樓內嘅議員同職員蜂擁而出，紛紛走到大樓外嘅添馬公園「避難」。惟千鈞一髮之際，有議員助理就懷疑秘書處未為佢哋嘅證件「解鎖」，搞到未能打開走火警專用通道嘅逃生門而被困，要靠議員證件開門，相當危險。不過，好彩尋日只係立法會大樓嘅火警演習，否則後果不堪設想。
泛民佔中違規 累限出入
雖然有人投訴秘書處為限制議員助理喺大樓內活動係草菅人命，但如果唔係泛民議員喺佔中期間唔守規矩，搞到大樓立立亂，秘書處又點會有呢啲限制措施呢？
而因為尋日立法會嘅會議唔多，所以只有劉慧卿（卿姐）、石禮謙（大舊石）、謝偉俊、何秀蘭、梁耀忠及盧偉國（WK）寥寥幾位議員參與演習。話就話係火警演習，但卿姐就一路行、一路滋油淡定咁傾電話；大舊石就攞住啲文件慢慢行，仲話「假o架嘛，使咩行咁快」，就連阿忠都係以散步嘅速度慢慢行去到公園。搞到啱啱開完會嘅WK都忍唔住話︰「唔知佢哋係咪因為自己係議員，連火神都怕咗佢哋？」
終靠議員證件開門「脫險」
呢頭啲議員慢條斯理，另一邊廂有議員助理就懷疑因為早前秘書處限制佢哋只可以喺所屬辦公室樓層活動，而增加咗佢哋證件出入嘅限制，搞到佢哋張證件開唔到走火通道嘅逃生門，最終要靠議員證件先至走得出「火海」。好彩今次只係演習，萬一真係發生火警，出咗咩意外，秘書處同違規嘅泛民議員都要為可能出現嘅悲劇負上最大責任。
立法會秘書處就話，今次火警演習最終有四百五十人去到添馬公園集合點，用咗十四分鐘，全程零意外。而協助今次演習嘅港灣消防局亦有派員觀察，仲話第一批去到集合點嘅人用咗四分半鐘，尚可接受喎。不過，如果真係有人走唔到，就算係跑手都無用，據聞秘書處會跟進事件。