中環出更：「二撇雞」博出位 貪曾幼子拎茅台送禮
「貪曾」前特首曾蔭權爵士幼子曾慶淳一向愛攀上流社會，埋「富二代」堆，近日就加入雲集政商界二代嘅菁英會。前晚佢以第十八期新丁身份現身菁英會聖誕派對，仲送咗支逾三千港元嘅貴州53度典藏茅台酒畀大會抽獎。曾慶淳咁多禮物唔送，何解要送酒呢？仲要係佢爸爸貪曾愛好嘅茅台添！
貪曾向來好酒，曾經聲稱捐出一批紅酒外，更被揭發喺卸任前將一批貴州茅台酒股份有限公司送贈、約值一百八十萬元嘅「香港回歸十年紀念珍藏」貴州茅台，秘密搬返前行政長官辦公室，有私吞部分公家美酒之嫌。既然佢爸爸貪曾咁多藏酒，曾慶淳隨手拎支去抽獎都話咁易啦！
頻向靚女搭訕
送禮都諗過度過嘅曾慶淳，喺派對上千方百計引人注目，黐上「二撇雞」鬍鬚扮晒嘢，繼而坐埋一邊拎部手機出嚟自拍，認真自戀。自拍一輪後，佢拎起酒杯四圍搭訕，見到靚女就一個箭步上前介紹自己，仲傾到手舞足蹈。可惜佢身形矮小，美女們對佢興趣麻麻，應酬一輪後就「閃開」。
卓妮