中環出更：小肥張拉隊開P撐社企
持續逾兩個半月嘅佔領行動影響深遠，特別係金鐘一帶嘅商戶叫苦連天，就連位於添馬公園間社企餐廳iBakery嘅生意都大受影響。佔領行動日前結束，勞工及福利局局長張建宗（小肥張）就即刻聯同常秘譚贛蘭及副局長蕭偉強等一班局內同事，拉大隊去餐廳開聖誕聯歡派對，一來為連月緊張嘅心情輕鬆吓，二來為餐廳員工打打氣。
雖然叫做聖誕派對，但小肥張就特別到會一隻燒豬，齊齊嚟過中式切燒豬儀式，唔知係咪金鐘政府總部重光後，想攞番個好意頭呢？小肥張仲話，以後唔止聖誕節，總之局內同事凡有升遷、聚會、或嫁娶買餅等都一定要佢哋幫襯社企喎，由於呢間社企餐廳請咗唔少智障員工，咁樣可令佢哋感覺備受尊重及重視。
尋日到場歡聚嘅仲有副秘書長張美珠及陳羿、康復專員譚惠儀、社會福利署署長葉文娟及勞工處處長唐智強等，一大班同事逼爆餐廳，於約短短一小時嘅聚會盡情食嘢玩遊戲抽獎。餐廳經理鄭仕禎就多謝勞福局經常支持。
飲食業缺人手「耆」招救亡
講到飲食業難請人，市面上有洗碗工人薪金高達一萬五千元，接近經理級薪酬，但仍一員難求。小肥張就話呢啲只係表面情況，實際上洗碗工人工時較長，福利較少，所以僱主應從福利入手及擴闊招聘目標。佢話，現時好多六十五歲長者仍願意工作，可考慮聘用長者或殘障人士，並配合彈性工時，以兼職請人嘅機會相對大啲。
卓妮