樓價回落無期望
陳小姐（廿多歲、教育界）：「剛剛買咗個約四百呎二手私樓單位，都要成三百幾萬元，梗係覺得價錢貴啦，但有需要買都無辦法。政府推出長遠房屋政策，相信都無助壓低個市，十年咁長遠，政府做嘢又慢，唔一定年年有咁多供應，可能一年多、一年少，唔會打冧樓價。」
劉小姐（廿五歲、醫護界）：「就算政府增加住宅供應十年多一萬個單位，對降低樓價幫助不大，內地人都會照來買樓，樓價依然高企。我諗住買二手舊私樓，大概三百幾萬元嘅約四百呎單位，希望長策緩和到樓價，小市民先有機會上車。」
歐先生（三十歲、攝影界）：「政府推出長策幫助唔大，好似求其做啲嘢咁。我計劃五年內買二手村屋，但價錢一直升。居屋定價市價七成都好貴，不如政府推出資助計劃直接畀錢合資格嘅人士置業，雖然會刺激樓價，但認真幫到市民上車，否則真係上樓無望。」
黎先生（三十一歲、運輸界）：「我已經有三個子女，上咗公屋，無諗過將來要買樓，樓價太貴。就算啲樓跌到二百幾萬元，居屋再跌價，我都負擔唔到。」