「頭搖又尾擺，飄移境界……」講緊嘅唔係一級方程式賽車甩尾，而係閣下坐緊嗰部巴士呀！鬼咩，個司機啱啱啪完藥瞌晒眼瞓，想唔左搖右擺都難啦！
藥駕唔係新聞，之不過咁，有啲司機大佬係被迫咁做嘅咋。有工會話，過去一個星期收到近三十宗車長投訴，話去九巴外判醫療中心睇病後，醫生畀藥唔畀假。其中一單畸士係咁嘅，有位車長因為感冒，去醫療中心求診，獲處方收鼻水藥同咳藥水，包裝上寫到明藥物會令人「昏昏欲睡」同「不可駕駛」，點知對方死都唔肯開假紙，無奈之下惟有自己扲荷包幫襯私家醫生；又有人腰痛求診攞唔到病假，反而睇急症就批足八日，至於其他有類似遭遇嘅車長，唔係被迫放無薪假就係唔食藥帶病返工，咁搞法，容乜易搞出人命。
食藥唔揸車，揸車唔食藥，道理一字咁淺。特別係職業司機喺路面駕駛，講得難聽啲，百幾名乘客條命就掌握喺佢手上，唔係講玩。正如有醫學界人士話齋，醫生如果向司機處方會影響駕駛能力嘅藥物，一般會批足病假，九巴畀藥唔畀假嘅做法好唔尋常。工會懷疑管理層諗縮數，慳番有薪病假嘅成本，向外判醫療中心醫生施壓，睇嚟唔係冇道理。
即係咁，強迫司機藥駕，司機健康受損、搵乘客條命較飛不特止，仲違反交通條例添。仲有吖，家陣係流感高峰期，如果有司機唔舒服都頂硬上，巴士變身流動播菌場，分分鐘爆大鑊！
好嘞，即使唔講員工同乘客安全，巴士公司咁樣算到盡，自以為好醒，其實係聰明笨伯就真。好簡單，一部巴士閒閒地講緊幾百萬，一個唔好彩撞穿撞爛，要幾多有薪病假至補得番吖，萬一搞出人命咯喎，更加得不償失。再講吖，九巴最近至加完價，仲係四年以來第三次，冇理由等錢使成咁啩。
唉，提起九巴，真係火都嚟埋。九巴嘅收費高，服務差，早就有口皆悲。淨係講脫班率，九巴舊年就達百分之三點七，係三間巴士公司之冠。嗱，咪以為問題好輕微，要知道運輸署對「脫班」嘅定義非常之咁寬鬆，簡單啲講，如果巴士公司承諾一個鐘頭十班車，唔理你點分布，總之開足就唔算脫班。所以咯喎，乘客等成粒鐘車都係等閒事，大家只要睇吓本報投訴版，三日唔埋兩日見到九巴個寶號，就知咩事啦。
一句講晒，唔該運輸署官僚做好自己份工，拿拿臨加強監管巴士服務。當然啦，呢單「逼車長藥駕」疑雲都唔可以輕輕放過——你估家陣真係拍緊《頭文字D》玩飄移咩！