立法會政府帳目委員會尋日繼續「公審」民航處處長羅崇文，有議員繼續窮追猛打處方「有錢唔收」嘅情況，事關部分航空公司拖欠過境導航費，截至今年十一月中總欠繳款額達一千八百多萬元。羅崇文繼續為懶追爛數藉口多多，一時話會盡力追收欠款，一時又話考慮到空中安全問題，唔贊成向有關公司停止或提供次等服務。加上佢領導嘅民航處爆出「大花筒」亂象，包括擅自喺處長辦公室加建淋浴設施，又設立舞蹈室及多購近百部液晶體顯示器等，確係「洗腳唔抹腳」，難怪被人鬧到體無完膚喇！
