一班被禁言嘅網民梗係唔妥版主啦，其他網民就跟住粗口留言，叫版主封鎖晒佢哋喎，部分更反諷係白鴿黨發言無理，要停止其發言權。最終該黨創意媒體部尋日要發出道歉聲明，死死地氣話版主處理留言做法不當，對網民致歉，聲言會深刻檢討，並解除被鎖用戶。
蝦碌不絕 向新同盟拉票
另外，同白鴿黨有好多牙齒印嘅新民主同盟（新同盟）透露前日卿姐打畀三年前轉投新同盟嘅新執委陳惠達，指名道姓向對方拉票。
新同盟議員范國威（Gary）寸白鴿黨黨員資料管理混亂，「令人側目」，仲保留咗卿姐電話留言添。卿姐尋日解釋，因為要打太多電話而搞錯，但就話對方今年五月先至退黨喎。Gary就話肯定陳惠達係一一年退黨，睇嚟兩黨又有一番爭拗喇。