政情：佔領散席泛民夠鐘埋單
歷經逾兩個半月嘅佔領行動，隨着警方將三個佔領點逐一清場而宣告落幕，一直為佔領行動推波助瀾嘅泛民主派政黨亦係時候為「去飲」埋單找數，承擔法律及政治責任。香港研究協會趁上星期清場前訪問約一千一百名市民，發現全港十五個坐擁立法會議席嘅政黨支持度幾乎全線下跌，其中喺佔領行動走在前線嘅街工、工黨及民協更位列三大民望「插水」政黨。
田少「做曳仔」拖累黨
雖然街工、工黨一直標榜爭取工人權益，但同時支持主張癱瘓香港經濟嘅佔領行動；加上街工唯一議員梁耀忠同工黨張超雄平日偶然亮相佔領區「抽水」，上月底卻忽然孖住去旺角為鳩嗚團「調停」不成，仲同警方嗌交，認真羞家。再者，工黨主席李卓人早前被揭收受壹傳媒集團前主席肥佬黎政治捐款醜聞仲未「找數」，工黨執委郭紹傑亦被揭涉嫌詐傷呃假去做佔中糾察隊長，難怪兩政黨形象插水式下滑。
事實上除咗自由黨，幾乎所有政黨均有逾三成市民給予一分「底分」，包尾五強更由社民連、人民力量及民主黨三大佔領「前鋒」包辦其中三位。雖然自由黨一直緊貼建制派路線，但前黨魁田北俊有乖仔唔做「做曳仔」，連全國政協都被搣柴，難怪該黨予人感覺左右不分，可能就此拖累支持度下跌。
搞不合作運動宜三思
一眾政黨之中，僅得民建聯（民記）及新民黨兩大建制政團嘅支持度能夠「逆市上升」，但亦分別僅以二點五分及二點四九分排名頭兩位。兩黨過去反佔中一直不遺餘力，其中新民黨葉劉淑儀更多次挺身撐警，博盡紀律部隊歡心。兩黨支持度上升，與港大民調顯示八成人認為應停止佔領行動嘅結果不謀而合。
民調又顯示，所有政黨喺「有活力」、值得信任、監督政府及議政能力下，仍全線下跌至於兩分徘徊，反映市民認為無論建制或泛民都係天下烏鴉一樣黑，睇嚟各政黨趁「後佔中」時期要好好諗清楚前路至得喇，否則未來兩年嘅區議會及立法會選舉隨時一鋪清袋，特別係泛民喺議會搞嘅不合作運動可以慳番都得嘞。