中環出更：96歲王霖潮用手機冇難度
立法會尋日採取清場行動前夕，十數名前立法局議員包括王霖、張有興、夏永豪、林漢強及蘇周艷屏等喺中午現身立法會大樓，與多位現任議員舉行酒會及午宴。其中王霖係最早到場嗰幾個，雖然佢去年帶過導賞團參觀立法會大樓，但佢都預咗呢日去立法會時要兜路同搵路，所以專登提早出門，點知去到始終都係搵唔到入口，曾向幾個保安同警察問路，最後都係要由警察帶路先搵到入口。
現身立會 雙眼精靈
唔知係咪因為立法會尋日下午三點開始清場，一班新舊議員食完晏見差唔多兩點幾鐘，就個個都雞咁腳急急離開。雖然今年已屆九十六歲嘅王霖走得冇咁快，但就講到明唔會去睇清場情況。問佢如果仲係議員身份嘅話，會否一早已提出清場？佢就話會同示威者傾偈溝通吓先。
卓妮發現王霖雙眼不知幾精靈，見佢邊行邊望住手機屏幕上啲蚊型字體，一啲困難都冇，事關佢對飲食非常注重，話「甘脆肥醲」等煎炸肥膩濃味食物一概少食為妙，係「腐腸之藥」喎，唔怪之得咁健康啦！
卓妮