未入正題之前，先考大家兩條問題。全港最大僱主係邊個？冇錯，係港府。咁最大無良僱主又係邊個？冇錯，都係港府，居然年尾流流派無情雞，想唔認無良都唔得啦，吓話！
件事係咁嘅，康文署轄下有十四個博物館及多個康樂、體育和文化場地，總共聘用約八千八百名外判員工，當中約二千八百人係保安員，其餘係清潔工。有博物館外判員工爆料，上月底突然接到主管通知，指康文署以財政理由裁減人手，人數達四百多人，佔整體外判人手百分之五，其中尖東更屬重災區，歷史博物館、太空館、文化中心各須裁員十多人。唉，你話係咪冇陰功吖？做得保安同清潔工嘅，本來已經係搵朝唔得晚嘅低薪一族，依家仲要挨近年晚收大信封，前路茫茫，年關難過，嗰份無奈同淒涼，可想而知。
本來呢，康文署如果基於實際需要裁減人手，無可厚非，問題係今次實在太不合情理，簡直同無良僱主壓榨剝削冇分別。係人都知，港府唔係冇錢吖嘛，點解要帶頭製造失業，令幾百個家庭陷入困境？今屆政府唔係話「由心出發，穩中求變」嘅咩，你哋個良心去咗邊度呀？咪話功夫茶踢爆，最廢財爺曾俊華早前要求各部門節流，康文署為咗交差，咪搵前線員工祭旗囉，肥上瘦下一向都係港產官僚嘅慣技嚟嘅啦。
更離譜嘅係，康文署今次失驚無神派無情雞，完全違反按工作量釐定人手嘅基本原則。官方數字顯示，近年博物館整體人流有上升趨勢，今年首十個月已共錄得五百一十五萬入場人次，按比例升約一成三，當中人氣最旺嘅科學館，更加比舊年全年多出十五萬人次添，喺咁嘅情況下，康文署唔增加人手，反而大幅裁員，你話係咪無厘頭吖。嗱嗱嗱，康文署唔好話畀功夫茶聽，你哋向清潔工開刀係想令博物館變垃圾崗，從而減低人流壓力吖，你哋不學無術無修養咋，唔可以阻止市民培養文化情操o架！
話時話，康文署都唔係第一次做無良僱主咯。作為全港最大外判服務僱用者，港府經常被踢爆刻薄外判工、縱容外判商壓榨，甚至罔顧外判工友嘅工作安全，難怪被人批評連良心都一併被外判。政府部門唔係為基層勞工爭取福祉，而係令佢哋朝不保夕，難怪民怨愈嚟愈大，社會愈嚟愈亂喇。咪話唔提醒，官老爺繼續倒行逆施，懶顧民瘼，就算佔中落幕，香港一樣動盪不安嘅咋。
咁講喇，康文署裁員節流唔係話唔啱，不過開刀對象唔係外判工，而係嗰啲尸位素餐、添煩添亂嘅無能官僚。佢哋高薪厚祿卻不理民間疾苦，掃除一個所慳番嘅錢，已經足夠保住十幾個基層勞工嘅飯碗喇，係咪！