相信唔少人都對促銷電話感到滋擾，多數會第一時間收線。新上任嘅中央政策組顧問李德強就有唔同睇法，佢話打呢類電話出嚟嘅人都有工作壓力，所以佢會傾聽對方講嘢一陣，唔會無情情收線咁話。李德強咁好人，皆因喺沙士期間經濟不景，有名大學生一直搵唔到好工，所以做咗電話促銷員，但係成日畀人cut線，積埋好多負面情緒，最後竟然跳樓結束生命。李德強對呢單新聞感受好深刻，所以自此就對促銷電話都來者不拒。
李德強做咗公務員三十七年，早前代替金融界人士何燕飛出任中策組顧問。據聞何燕飛係因健康理由離職，而李德強身體應該好健康，事關佢一向愛好打羽毛球，加上廿年前開始玩長跑，仲愈跑愈起勁，周不時去半山寶雲道跑番六公里。佢仲參加咗渣打馬拉松嘅半馬拉松賽事幾年，不過跑得快都冇用，因為今次唔夠早報名，明年冇得落場跑，只能做觀眾。