中環出更：行工展 遇知音 黃錦星贈果汁
工展會尋日喺銅鑼灣維多利亞公園開鑼，唔少政界人士都去趁墟買嘢，要數最開心嘅人就非環境局局長黃錦星莫屬喇！事關佢率先幫襯一間少數族裔社企，買咗半打巴基斯坦杧果汁即場試飲。期間有市民同佢講，見佢因「三堆一爐」撥款申請喺立法會被泛民議員「整蠱」（指拉布），好戥佢唔抵，不過好開心依家三個堆填區嘅擴建撥款申請已過晒關，星爺聽到開心笑晒，即刻請呢位市民飲杧果汁添！
黃錦星行工展會之餘亦不忘環保本色，笑笑口提醒人要將杧果汁嘅玻璃樽回收，最好將塑膠樽蓋分埋類。
高永文掃沙甸魚罐頭
入場掃貨嘅仲有食物及衞生局局長高永文，佢行咗個圈已經大有斬獲，包括幫襯社企買咗酸梅湯、葡萄醋及手作聖誕樹等，仲買咗泰式罐頭沙甸魚。佢話鍾意食沙甸魚而唔食吞拿魚罐頭，係因為沙甸魚繁殖力強，相反吞拿魚已經開始瀕臨絕種，所以唔忍心食。好多人怕食辣，但高永文幾年前頻頻去四川賑災，由嗰時開始鍾意食辣，因此連買沙甸魚都首選香辣嘅泰式。
林健鋒買零食唔知價
行工展會係唔少人嘅童年回憶，立法會議員林健鋒（Jeffrey）都係常客。佢話當年雪糕批同椰子糖係行工展會必食之選。咁佢仲記唔記得一個雪糕批幾錢？自細衣食無憂嘅Jeffrey笑笑口話，細個買玩具同零食全部由父母畀錢，所以唔記得價錢喎！Jeffrey又好得戚咁話，佢仲保存粵劇名伶白雪仙同梁醒波昔日行工展會嘅珍藏相片，遲啲要拎出嚟畀大家睇吓咁話。
卓妮