開講有話，狗咬人唔係新聞，人咬狗至係新聞。同樣道理，香港地大型基建工程延誤超支，大家早就見怪不怪，但家陣居然發展到超出原造價三倍咁誇張，又真係唔到你唔服。
功夫茶講緊嘅咪係蓮塘/香園圍口岸大樓囉。工程喺○七年時已經完成規劃，當時嘅預算係十九億元，點知拖吓拖吓，造價漲吓漲吓，最新報價已經係八十八億元，唔單止半年急升十九億元，仲係當初預算嘅四倍有多，問你怕未。即係咁，由於政府將整個口岸斬件申請增加撥款，暫時難以掌握全面造價上升幾多，換句話講，呢八十八億可能只係面頭嗰浸咋。仲有吖，工程其中一份標書嘅有效期今個月底屆滿，如果期限前仲未通過撥款，就要重新招標，到時造價勢將進一步上升。
嗱，咁就擇使嘞。你知啦，家陣反對派大玩不合作運動，為拖垮施政無所不用其極，要立法會通過撥款直頭難過登天。冇錯，港府早排話會變招，將拉布影響嘅撥款同開位建議直接提上財委會，繞過被反對派佔領嘅工務小組以及人事編制小組，問題係家陣佔領運動已經收皮，反對派少咗一個同政府周旋嘅重要籌碼，仲唔出盡吃奶之力搞所謂議會抗爭咩。再講吖，道高一尺，魔高一丈，咪畀人睇死，港府變來變去，到頭來都係畀人玩番轉頭嘅咋。
所以話啫，無良政客搞搞震無幫襯，有破壞冇建設，真係害人不淺，有人話清除阻街路障容易，清除議事堂內阻頭阻勢嘅人形路障先至艱難，真係一啲都冇講錯。不過咁，政客無良固然可憎，官僚無能同樣累人累物。早排有團體分析過十一個大型基建項目，發現多間大型建築公司同時包攬多個合約，更加離譜嘅係，大部分工程嘅高峰期全部集中喺明年。基建工程萬箭齊發，必然攤薄人手，影響進度，從而推高成本，呢個係基建規劃嘅ABC，港產官僚咁都唔曉，有咩法子唔倒錢落鹹水海吖。
講嚟講去，始終都係納稅人最冤枉。其他唔講，淨係講十大基建，保守估計合共超支逾千億元，其中港珠澳大橋香港口岸工程，當初核准預算大約三百億元，家陣估計最少要加碼五十億元，最終要幾多錢落樓，真係冇人話得埋。你話嘞，呢度幾十億，嗰度幾百億，就算識印銀紙都唔掂啦。
不過冇計啦，反正都係阿公埋單，政客同官僚又點會肉痛吖。計功夫茶話齋，基建開支應該同佢哋嘅人工掛鈎，按超支比例扣俸祿，睇吓佢哋仲係咪咁唔嗲唔吊，關人個關吖嗱！