中環出更：接棒反吸煙 盛讚文功
臨近年尾，一眾慈善團體莫不趁埋單計數之前發力籌款。早前九龍樂善堂舉辦慈善晚宴，為「樂善關懷基金」籌款，董事局成員及城中名流齊去支持。卓妮見到樂善堂兩位前主席鄺祖盛（Antonio）及劉文文（Lisa）企埋一邊密斟，細心一問，原來係講緊香港吸煙與健康委員會（下稱委員會）嘅工作。致力反吸煙十幾年嘅Lisa，三個月前卸任委員會主席，由Antonio接棒。Antonio賣口乖話，Lisa做得咁好，令佢好大壓力喎！
Lisa就笑笑口叫Antonio唔使驚，話Antonio仲有大把嘢做。問Lisa任內有乜嘢最難忘，身旁嘅食物及衞生局副局長陳肇始即刻鬼馬搶答，話係連加三次煙稅喎！
前任成功減煙民比例
其實Lisa任內仲成功游說政府推出多項反吸煙政策，成功將吸煙人口比例降低至個位數，都叫做交出一份靚成績表，但佢就話仍有好多做嘢空間，例如將煙盒包裝上嘅圖像警示面積擴大，以收阻嚇性，仲有報攤等香煙銷售點仍以燈箱展示煙包，香港應該跟隨挪威等國明文禁止咁話。
講番個晚宴，樂善堂主席羅永順、晚宴籌委會主席李聖潑等人忙到滿場飛。
「暗瘡剋星」種出番薯
至於該會嘅常務總理兼「暗瘡剋星」楊小玲（Jackeline）當晚都有去撐場招呼朋友。一向追求健康嘅Jackeline喺屋企露台種好多瓜菜，成日有收成，早幾日仲意外種出幾條大番薯，放埋一邊等乾晒水後煲番薯糖水食，真係夠晒有機。
卓妮